Link açıqlığı

Qırımda «Hizb ut-Tahrir» işiniñ şahıslarını sentâbr 8-ge qadar apiste qaldırdılar – Smedlâyev


Qırım Yuqarı mahkemesi

Rusiyege boysunğan Qırım Yuqarı mahkemesi iyül 1-de olıp keçken toplaşuvda «Hizb ut-Tahrir» teşkilâtınen alâqaları ile qabaatlanğan Qırım musulmanları – Refat Alimov ve Arsen Cepparovnıñ apis müddetiniñ uzatılmasından berilgen şikâyet arizasını qanaatlendirmedi.

Bu aqta Qırımtatar Milliy Qurultayı Merkeziy saylav komissiyasınıñ reisi Zair Smedlâyev bildire.

Onıñ malümatına köre, toplaşuv cuma künü eki saat keç qalıp başladı.

«Beklegenimiz kibi, yañı bir şey olmadı! Refat Alimov ve Arsen Cepparovnıñ apiste bulunması sentâbr 8-ge qadar deñişmey qaldı», – dep yazdı o Facebookta.

Qırımnıñ uquq qoruyıcı ve mahkeme organlarınıñ resmiy izaatları yoq.

İyün 17-de Aqmescit Kyiv rayon mahkemesi Refat Alimov ve Arsen Cepparovnıñ apiste bulunmasını sentâbr 8-ge qadar uzattı.

Qızıltaş (Büyük Yalta) köyünde aprel 18-de Rusiye uquq qoruyıcıları tintüv keçirip musulmanlarını tutıp qapattılar. Rusiyege boysunğan Qırım prokurorı Natalya Poklonskaya Yaltada «Hizb ut-Tahrir» teşkilâtınen bağlı olması ile qabaatlanğan eki kişi yaqalanğanını aydınlattı.

Bu sene fevral ayınıñ 11 ve 12 künleri Rusiye uquq qoruyıcıları Qırımdaki islâm tarafdarlarnıñ evlerinde bir sıra tintüv ve yaqalanmalarnı keçirdiler. Cemi 14 kişi yaqalandı, olardan dört kişi apis etildi: Yaltadan insan aqları kontakt gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve yaltalı Vadim Siruk. Federal telükesizlik hızmetiniñ taqiqatçıları olarnı Rusiyede yasaqlanğan «Hizb ut-Tahrir» teşkilâtınen bağlı olğanında qabaatladılar.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.


XS
SM
MD
LG