İşğal etilgen Qırmda «separatizm» ile qabaatlanğan Qırımtatar Milliy Meclisi reisi muavini İlmi Ümerovnıñ rus adliyecisi Mark Feygin «Memorial» uquq qorçalayıcı merkezinden yardım istegenini bildire.
«Qırımda Bağçasaray rayonı memuriyetiniñ sabıq başı İlmi Ümerovnıñ işinde destek almaq içün «Memorial» uquq qoçalayıcı merkezine işdeşlerime muracaat ettim. Onıñ adliyecisi olaraq, onıñ içün Rusiye Cinaiy Kodeksi 280.1 maddesiniñ 2-nci qısmı (separatizm) boyunca siyasiy quvalanğan statusını isteycem. Çoq yaqın zamanlarda aynı ricanen Amnesty Internationalğa muracaat etecekmiz», – dep yazdı Feygin Facebookta.
Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.
Mayıs 19-da Qırımtatar Milliy Meclisiniñ reis muavini İlmi Ümerovğa Rusiye Federal havfsızlıq hızmetiniñ Qırım idaresinde sorğudan soñ qabaatlavnı taqdim ettiler. Mayıs 12-de onıñ evinde tintüv keçirildi, Rusiye FSB-niñ Qırım idaresiniñ taqiqatçısı oña çıqmamaq şartını bildirgen vesiqanı berdi. Bundan soñ taqiqatçılar İlmi Umerovnı iş malümatını faş etmemesi aqqında imza qoymağa mecbur ettiler. Sorğuğa onıñ apayı ve balaları da çekilgen edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
