Kurort mevsiminde Rusiye tarafından işğal etilgen Qırımnıñ yolları devlet faalleri portretleri ile bilbordlarnen tolu, dep bildire Qırım.Aqıqat .
Böylece, Qırım yollarınen areket etip Rusiye imperatoru II Yekaterina, çar Nikolay ve şimdiki Rusiye prezidenti Vladimir Putin ile bilbordlarnı körmek mümkün. Bu bilbordlarnı saylav kampaniyası içün logotipi stendlerde yerleşken «Yedinaya Rossiya» fırqası yerleştiredir. Portretniñ yanında – tasvirlengen faalniñ alınmalarıdır.
Rusiye Devlet Duması saylavları sentâbr 18-de keçecektir. Olar bir künde, qarışıq sistema boyunca keçirilecek: 225 deputat firqa cedvelinden saylanacaq, 225 – vilâyet bir mandatlılardan. Em de yedinci çağırtuv parlamentine beş fayızdan daa çoq alğan firqalar keçecek.
Rusiye 2014 senesi işğal etken Qırımda da saylavlar keçecektir.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
