Rusiyege boysunğan Qırım yolbaşçısı Sergey Aksenov yaqın zamanda türk biznesi Qırımğa qaytacağından emin.
«Qırımğa qaytmaq içün Türkiye biznesine zaman kerek olsa da, yaqın zamanda Türkiye iş adamları yarımadada körüneceginde şübelenmeyim», – dep yazdı o Facebookta.
«Bu bir ya da eki künde radikal deñişmeler olacağını bildirmey. Prezidentimiz Vladimir Vladimiroviç Putin Rusiye akimiyetine Türkiye akimiyeti ile munasebetini eyiliştirmege tünevin emir berdi ve, elbet de, bunı kerçekleştirmek içün zaman keçmeli. Qayd eteyim ki, mında siyaset olmaycaq – tek biznes olacaq», – dep qoştı o.
Türkiye Rusiye cenk uçağını urğan soñ Rusiye tarafından teşkil etilgen Türkiyege qarşı kampaniyağa İşğal olğan Qırım da faal sürette qoşuldı. Türkiye Cumhuriyetinen işlerini keseler ve yatırım leyhalarını lâğu eteler, dep ilân etti yarımada akimiyeti. Qırım cemaatı Aqmescit merkezinde halq ögünde aktsiya keçirdi, o aktsiyada Türkiye prezidentiniñ süreti ile qorqulıqnı yaqtılar.
İyün 27-de Kremlde ilân ettiler ki, Türkiye prezidenti Recep Tayyip Erdoğan türk askerleri urğan Rusiye cenk uçağı içün afu soradı ve vaziyetniñ eyileşmesine ümüt etkenini bildirdi.
