İstanbulda terakt sebebinden ölülerniñ sayısı 42-ge qadar arttı. Çarşenbe künü yaralanğanlardan biri can berdi. Ölüler arasında – 13 yabancı, şu cümleden de Ukraina vatandaşı, dep bildire Radio Svoboda.
239 kişi yaralanğan, olardan 128 hastahanelerde qala, 40 kişiden ziyade ameliyathanede.
İstanbuldaki Ukraina Baş konsullığınıñ iyün 29-da aqşam ilân etilgen haberine köre, «şimdi İstanbulnıñ hastahanelerinde halqara Atatürk ava limanında terrorist ücüminde zararlanğan eki Ukraina vatandaşı buluna». «Üçünci yaralanğan yaqın zamanda evge qaytmağa planlaştıra», – dep qoşalar diplomatlar.
Kimse ücüm mesüliyetini öz boynuna almadı. Türkiye baş naziri Binali Yıldırım bildirdi ki, ava limanındaki terakt mart ayında Brüsselde «İslâm devleti» kerçekleştirgen ücümge oşay.
Dünya liderleri ve BMT Türkiyedeki teraktnı takbih ettiler. Soñki bir qaç ay içinde Türkiye bir sıra ücümge oğradı. Kurd boyevikleri ve «İslâm devleti» ekstremist taqımları ücüm kerçekleştirilmesi ile qabaatlana.
