Rusiye tarafından işğal etilgen Qırımda «SimSitiTrans» naqliye şirketiniñ işi toqtatılğan soñ aman-aman 400 Qırım sakini, çoqusı qırımtatarı, işsiz qalacaq.
Bu aqqında şirketniñ iyün 29-da, çarşenbe künü, Kremlge boysunğan Qırım mahkeme temsilcileriniñ Rusiye Federal hızmetiniñ qararına köre, «SimSitiTrans» mülküni müürlemege başlağandan soñ aydınlatılğan beyanatında aytıla.
«Qırımda dünyağa keldim, soñ sürgün etildim, mında qaytqan soñ qırımtatarlarğa işke kirmege ve Vatanda yer tapmağa yardım etmege tırışa edim. Bu istegim 2002 senesi muvafaqiyetli çıqtı, qorantam «SimSitiTrans» naqliye şirketini qurdı, anda ise bu künge qadar 400 adam çalışa edi, çoqusı qırımtatarı... Şimdi o çalışmaycaq, bunı añlamağa zor – bugün onıñ faaliyeti toqtatıldı, demek ki, anda çalışqan 400 insan soqqaqta qalacaq», – dep aytıla şirketniñ Baş müdiri, Qırım qamaçavı lideri Lenur İslâmovnıñ babası – Edem İslâmovnıñ beyanatında.
Soñki 14 yıl içinde ilk sefer «SimSitiTrans» avtobusları şeer ve şeerlerara seferlerge çıqmadı. Bu zaman içinde «SimSitiTrans» 127 mln yolcunı taşıdı, dep bildire Edem İslâmov.
«2008 senesi biz eñ yañı aletlernen donatılğan zemaneviy avtonaqliyat kompleksini qurdıq, anda üç ileri resurs qorçalağan tehnologiya leyhası yerine ketirildi... Er yıl şirket bücetke ve başqa fondlarğa 20 mln rubleden daa çoq para tölene. Çalışqan zamanımızdan berli şeer ve cumhuriyet akimiyetinen beraber bir çoq içtimaiy leyhanı kerçekleştirdik», – dep qayd ete şirketniñ Baş müdiri.
İyün 29-da, çarşenbe künü, Qırım qamaçavınıñ lideri Lenur İslâmovnen bağlanğan Qırımnıñ eñ büyük naqliye şirketi olğan «SimSitiTrans» işhanesiniñ işini blok ettiler. Şirket avtobusları marşrutlarğa çıqmadı.
Mahkeme temsilcileri Qırımda iyün 29-da işhaneniñ mülküni müürleyip faaliyetini toqtattı. «SimSitiTrans» şirketiniñ faaliyeti mahkeme tarafından 90 künge toqtatıldı.
