Rusiyeniñ «Vedomosti» neşiri federal bücetiniñ masraflarını qısqartmaq içün Rusiye maliye Nazirliginiñ tekliflerine dair vesiqanı yayınladı. Neşirniñ malümatına köre, işğal olğan Qırımnıñ maliye etilmesini eki qattan ziyade qısqartmağa teklif etile.
Gazetada maliye nazirliginiñ devlet programmalarınıñ maliye etilmesi ve 2017-2019 seneleri federal bücetniñ masraflarınıñ esas yönelişleri boyunca tekliflerine atıf etile. «Vesiqanıñ kerçek olğanını federal memur tasdıqladı, nazirlikniñ resmiy vekili ise raqamlarnıñ doğru olğanını ayttı», – dep yaza gazeta.
Vesiqada aytılğanına köre, bücetniñ masraflarını bütün üç yılğa yılda tamamen 15,78 trln rublege buzlatmağa teklif eteler.
Berilgen malümatqa köre, beden terbiyesi ve sport inkişafı boyunca devlet programması maliyesiniñ azamiy qısqartmasını bekley (üç yıl içinde eki qattan çoq), Uzaq Şarqnıñ ve Baykal regionınıñ içtimaiy-iqtisadiy inkişafı devlet programması ise birden 20 qat qısqartılacaq.
«Qırımnıñ içtimaiy-iqtisadiy inkişafınıñ maliyeti eki qattan ziyade eksiltile: 2016 yılında 149,3 mlrd rublden 2019 senege qadar ise 65,98 mlrdqa», – dep aytıla maqalede.
Rusiye maliye naziri Anton Siluanov işğal etilgen Qırımnıñ maliye etilmesini 17,1 mlrd rublge, yani 223,9 mln dollarğa qadar eksiltmege teklif etkenini fevralde bildirgen ediler.
Rusiye maliye nazirligi neşir etilgen malümatnı resmiy şekilde daa izaatlamadı.
Kütleviy haber vastaları Rusiyege boysunğan Qırım yolbaşçısı Sergey Aksenovnıñ Rusiye prezidentine Qırımnıñ maliyesini qısqartmamaq ricasınen mektübi aqqında bildirmege başladılar. Bu mektüp ise sanki hakkerlerniñ qollarına tüşti ve yayınladı, dep bildirile. Aksenov ise onıñ adından yazılğan mektüpke provokatsiya dep ayttı.
