Eki soñki afta içinde Qırımdan ve Donbasstan memleket içinde köçip kelgenlerniñ sayısı 4 biñ 627 kişige qadar eksildi. Bu aqta İçtimaiy siyaset nazirliginiñ matbuat hızmeti bildire.
«2016 yılınıñ iyün 29-nıñ vaziyetine köre sakinlerniñ içtimaiy qorçalav vilâyetleriniñ ve Kyiv vilâyeti devlet memuriyet struktur bölüklerine köre, Donbasstan ve Qırımdan köçip kelgen 1 788 527 kişi ya da 1 447 343 qoranta qayd etildi», – dep bildire matbuat hızmeti.
Nefaqa içün 897 971 qoranta muracaat etti, 837 138 qorantağa ise yardım berildi.
2016 yılınıñ başından yardım alğanlarğa 1 650 066 biñ grivna maliye etildi, dep qayd etti hızmet.
İyün 13-de Qırımdan ve Donbasstan memleket içinde köçip kelgenlerniñ sayısı 1 mln 783 biñ 900 insannı teşkil etken edi.
Ukraina şarqında 2014 senesinden başlap alâ daa devam etken silâlı zıddiyet kete. Ukraina ükümeti o yerde Rusiye tarafından desteklengen silâlı taqımlarğa qarşı tedbirlerniñ keçirilmesini ilân etti.
Rusiye ükümeti, Ukraina ve Ğarp bildirgen rusiyeli askerlerniñ davada iştirak etkenleri aqqında malümatını bir qaç kere red etken edi. Moskva, Donbassta tek rusiyeli «göñülliler» bulunğanını tanıy.
Birleşken Milletler Teşkilâtınıñ iyün 13-de aydınlatqan malümatına köre, Ukraina şarqında zıddiyetniñ başından anda 9371 insan öldi, 21 523 insan yaralanğan edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
