Qırımda mahkeme temsilcileriniñ rusiyeli Federal hızmeti Qırımnıñ eñ büyük naqliye şirketi olğan «SimSitiTrans» işhanesiniñ mülküni müürley, onı Qırım qamaçavı aktsiyasınıñ lideri Lenur İslâmovnen bağlaylar.
Bu aqta Kremlge boysunğan Qırım ükümetiniñ «ruporı» olğan «Krıminform» saytı, Qırımda mahkeme temsilcileri Federal hızmeti idaresiniñ matbuat kâtibi Viktoriya İvanovanıñ malümatına esaslanıp, bildire.
«Bu işhane faaliyetini alıp barmasın dep, onıñ mülküni müürleymiz. İcra faaliyeti bugün saat 6.00-da başlandı ve şimdi daa devam ete. Faaliyet, mahkeme qararına esaslanıp, alıp barıla. Tünevin tahminen saat 12.00-de «SimSitiTrans» şirketiniñ memuriyeti temsilcilerine icra faaliyeti aqqında mahkeme qararı teslim etildi. Bu mahkeme qararı acele ömürge keçirilmek kerek», – dep añlattı İvanova.
Onıñ sözlerine köre, «SimSitiTrans» şirketiniñ faaliyeti mahkeme tarafından 90 künge toqtatıldı.
İyün 29-da çarşenbe künü Qırımnıñ eñ büyük naqliye şirketi olğan «SimSitiTrans» işhanesiniñ işini blok ettiler. Şirket avtobusları marşrutlarğa çıqmadı.
Kremlge boysunğan Aqmescit memuriyetiniñ matbuat hızmetinde bildirgenlerine köre, memurlar «işbu taşıyıcınıñ şeer marşrutlarında deñiştirüv» işlerini alıp bardı.
«SimSitiTrans» şirketiniñ yolbaşçılığınıñ işbu vaqia boyunca izaatları daa yoq.
Mayıs 20-de Aqmescit memuriyetiniñ reisi Gennadiy Baharevniñ bildirgenine köre, memuriyet «SimSitiTrans» şirketinen yedi avtobus marşrutı boyunca añlaşma munasebetlerini toqtattı.
Mayıs 20-de rusiyeli uquq qoruytıcılar Qırımnıñ eñ büyük naqliye şirketi «SimSitiTrans» işhanesinde kene de tintüv keçirdi.
Bundan evel, 2016 senesi fevral ayında şirket ofisi endi tintüvden keçirildi. O vaqıt maskalı ve silâlı uquq qoruyıcılar naqliye işhanesiniñ işini blok etti.
Rusiyege boysunğan Qırım prokurorı Natalya Poklonskaya o vaqıt ilân etti ki, «SimSitiTrans» Aqmescit şirketiniñ faaliyetini kimse blok etmedi, fevral 1-de işhanede iç taqiqat faaliyeti alıp barılmadı. Onıñ sözlerine binaen, uquq qoruyıcılar işhanege bundan evel belgilengen bozmalar aqqında ihtarnı bermek içün keldi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
