İstanbuldaki Ukraina baş konsulı Vasiliy Bodnarnıñ bergen malümatına köre, iyün 28-de aqşam İstanbul ava limanında yüz bergen terakt neticesinde bir ukrainalı qadın öldi, daa bir vatandaş yaralandı.
Bunı Bodnar Twitter saifesinde yazdı.
«Maalesef, kederli haber – İstanbul ava limanındaki terakt neticesinde bir Ukraina vatandaşı can berdi, daa bir kişi yaralı», – dep yazdı baş konsul. Şimdilik başqa bir malümat yoq.
Türkiyedeki Ukraina elçihanesi iyün 28-de aqşam İstanbul ava limanında kerçekleştirilgen patlavlarnı «terrornıñ varvar ücümi» dep adladı.
Soñki resmiy malümatqa köre, İstanbul ava limanındaki ücüm neticesinde eñ azından 36 kişi elâk oldı ve 147 insan yaralandı. Kimse ücüm mesüliyetini öz boynuna almadı. Türkiye baş naziri Binali Yıldırım bildirdi ki, ava limanındaki terakt mart ayında Brüsselde «İslâm devleti» kerçekleştirgen ücümge oşay.
Dünya liderleri ve BMT Türkiyedeki teraktnı takbih ettiler. Soñki bir qaç ay içinde Türkiye bir sıra ücümge oğradı. Kurd boyevikleri ve «İslâm devleti» ekstremist taqımları ücüm kerçekleştirilmesi ile qabaatlana.
