İyün 28-de aqşam İstanbulnıñ Atatürk halqara ava limanında kerçekleştirilgen terakt neticesinde eñ azından 36 kişi elâk oldı, 147 insan (şu cümleden politsiya hadimleri) yaralandı.
İstanbul Ukraina baş konsulı Vasiliy Bodnar Twitter saifesinde bildirdi ki, konsullar teraktta yaralanğan yatqan hastahanelerni teşkere. Zarar körgen ukrainler aqqında resmiy malümat daa yoq.
Türkiyeniñ resmiy şahısları bildirgenine köre, üç canlı bomba ava limanına taksi ile kelip, özüni politsiyanen çatışqan soñ patlattı. Olardan biri yolcularğa ateş açtı.
Şaatlarnıñ aytqanına köre, ava limanında üç patlav yüz berdi, yolcular arasında panika başladı.
Adamlar ava limanından tahliye etildi, uçaqlar yaqındaki ava limanlarına yöneldi, raatlıq künleri uçuşları lâğu etildi, amma saat 3:00 uçuşlar tekrar başladı. AQŞ İstanbul seferlerini lâğu etti.
Türkiye Adalet naziri Bekir Bozdağ ava limanındaki metro stantsiyasında patlav alâmetleri olğanını bildirdi.
Türkiye baş naziri Binali Yıldırım bildirdi ki, ava limanındaki terakt mart ayında Brüsselde «İslâm devleti» kerçekleştirgen ücümge oşay.
Türkiye prezidenti Recep Tayip Erdoğan zarar körgenler arasında «qabaatı olmağan vatandaşlar» olğanını bildirip, ücümni takbih etti. O, bunıñ kibi «deşetli» ücümler dünyanıñ er angi ava limanında ola bilecegini ayttı.
«Dünyanı, hususan ğarp memleketlerini, terrorizm ile küreşte sert bir yer almağa çağıramız», – dep ayttı Türkiye prezidenti.
Beyaz saray, Birleşken Milletler Teşkilâtı, Almaniya ve diger memleketler ücümni takbih ettiler.
«Atatürk halqara ava limanı bu sene ücümge oğrağan Brüssel ava limanı kibi halqara birlik ve umumiy birlikniñ bir timsalidir», – dep ayttı Beyaz saraynıñ vekili Josh Earnest.
«Bizler, eskisi kibi, ittifaqdaşımız ve NATO ortağımız Türkiyege qoltutamız», – dep qoştı o.
Soñki bir qaç ay içinde Türkiye bir sıra ücümge oğradı. Kurd boyevikleri ve «İslâm devleti» ekstremist taqımları ücüm kerçekleştirilmesi ile qabaatlana.
