İşğal etilgen Qırımda yerli ükümet organlarınıñ devlet şahısları içün plâjlar temizlemesi keyfiyetine qıymet kesüv kriteriylerni ve olarnıñ qaidelerge uymağanı içün ceza bermesini kirsetmege planlaştıra.
Bu aqta Rusiyege boysunğan Qırım yolbaşçısı Sergey Aksönov Nazirler Şurası toplaşuvında ilân etti, dep bildire yarımadanıñ rusiyeli ükümetiniñ matbuat hızmeti.
«Bizde bazı devlet şahısları saqlana: problema tek peyda olsa, kimse tatilde, kimse daa bir yerde. Yerli devlet şahıslarınıñ ve deputat korpusınıñ çoqusı, olarğa idare etmek içün berilgen territoriyanıñ vaziyetini baqmaq içün, öz kürsülerden turmağa istemeyler», – dedi Aksönov.
Kurort nazirine o, er afta plâjlarnıñ sanitar vaziyetini köstergen fotoresimlerni yollamağa avale etti.
Fevqulade vaziyetler nazirliginiñ Qırım idaresinde yaznıñ başında bildirdiler ki, Qırım yalı boyun çöplük miqdarı boyunca lider ola. O yerde er plâjdan orta olaraq tahminen 200 kilogramm çöplük çıqarıla.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
