Eski Qırım şeerinde suvnen bağlı meseleler sebebinden maalliy fevqulade vaziyet ilân etildi. Merkeziy suvnen teminlenmeni iyül 4-ke qadar tüzetmege planlaştıralar. Bu aqta Rusiyege boysunğan Qırım mesken-kommunal hocalığı naziri Aleksandr Jdanov iyün 28-de keçirilgen rusiyeli Qırım ükümetiniñ toplaşuvında ilân etti, dep bildire Qırım.Aqiqat.
«İyün başında şiddetli yağmurlar yağdı, suspenziya köterildi. Suv bulanıqlığı seviyesi qaidelerge köre olması kerek olğan 25 milligrammdan 600 milligrammğa köterildi. Eski Qırımnıñ suv anbarından teminlenmesi toqtatıldı. Bundan sebep maalliy fevqulade vaziyet ilân etildi», – dep bildirdi Jdanov.
Onıñ sözlerine köre, şimdiki vaqıtta şeerge suv mahsus suv taşığan maşnalar vastasınen ketirile, arbiy adamlar ve kommunal hızmeti hadimleri yañı suv borularını qoya, suv ketirilmesi salı künü aqşamğa qadar ziyadeleştirilmek kerek, Eski Qırımda meseleni bütünley çezmege iyül 4-ke qadar söz bereler.
10 biñ kişilik şeer endi bir ay devamında merkeziy suvnen teminlenme olmadan yaşay. Aynı vaziyet Aluşta rayonındaki Aşağı Şuma (Nijnâya Kutuzovka) köyünde. Bu yerge suv avto tsisternalarnen ketirile, amma ava sıcaq olğanından sebep ealige suv yetmey.
Qırım Rusiye tarafından işğal etilgen soñ Ukraina yarımadağa Şimaliy-Qırım kanalında suv berilmesini toqtattı. Bu kanal vastasınen Ukraina Qırımnıñ suv ihtiyaclarınıñ 85 fayızını teminley edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
