Link açıqlığı

İyün 27-de Yedi Quyu (Lenino) rayonıdaki meskün yerlerde energiyanen teminlenme toqtatıldı. Yarıq Bulğanaq (Bondarenkovo), Arma Eli (Batalnoye), Qıdırlez (Voykovo), Mama (Kurortnoye), Minareli Şiban (Yerofeyevo) köylerinde söndürildi. Umumen olaraq 6644 insan yarıqsız qaldı, dep bildireler Rusiyege boysunğan Fevqulade vaziyetler nazirliginiñ Qırım idaresinde.

Müessiseniñ bildirgenine köre, saat birge yaqın energiyanen teminlenme yañıdan tiklenildi. Elektrik energiyası berilmesiniñ toqtatılmasınıñ sebebi bildirilmey.

Bundan evel Kezlev elektrik ağlarında bir sıra qaza aqqında malümat peyda olğan edi. Energetikler bunı sıcaq avanen bağlı olğanını belley.

Qırımda 2015 senesi dekabr ayından başlap Herson vilâyetinde yerleştirilgen elektrotayamanıñ ihtimal patlavı sebebinden Ukrainadan elektrik energiyasınıñ berilmesi toqtatıldı.Qırımğa 250 megavat bergen elektrik keçirme ağı tamir etilgen, lâkin yarımadağa onıñ temin etilmesi añlaşma bitkeni içün şimdiki vaqıtta elektrik energiyası berilmey.

Şimdiki vaqıtta, Rusiye tarafından işğal etilgen Qırım kendi generatsiya, Rusiyeden generator tertibatı ve Kubandan yapılğan energiya köpüri yardımı ile teminlene.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG