Link açıqlığı

Hayser Cemilevniñ imayesi şartlı müddetten evel azat etilmesini bir daa talap etmege niyetlene


Hayser Cemilev, arhiv fotoresimi

Qırımtatar lideri Mustafa Cemilevniñ rusiye apishanesinde bulunğan oğlu Hayserniñ imayesimahsus yapılmağan öldürüv içün mahküm etilgenniñ şartlı müddetten evel azat etilmesini talap etip, avgust ayında mahkemege muracaat etmege niyetlene.

Bu aqta TASS agentligine onıñ adliyecisi Nikolay Polozov bildirdi.

«Şimdiki vaqıtta şartlı müddetten evel azat etilmesi boyunca arizanen bağlı faaliyet alıp baramız, çünki avgust ayında bu arizanen bir daa muracaat etmek aqqımız bar», – dedi o.

Hayser Cemilev Astrahan şeerinde apiste buluna. Bundan evel o yerdeki mahkemeler şartlı müddetten evel azat etilmesi boyunca qarar almaqnı red etti.

«Oña (Hayser Cemilevge) apishanede tahminen yarım yıl bulunmağa qaldı, noyabr 26-da onıñ müddeti bite, çünki, hatırlatayım ki, Yuqarı mahkeme appelâtsiyası Krasnodar vilâyet mahkemesi tarafından belgilengen müddetni üç yarım yılğa qadar qısqarttı», – dep qayd etti Polozov.

Adliyeciniñ bildirgenine köre, Hayserniñ sağlığı yerinde, amma oña ceza berile, o, çoqusı vaqıt ceza izolâtorında buluna.

Polozovnıñ qayd etkenine köre, bu afta o, Ukraina konsullarınen beraber Hayser Cemilev ile Astrahan apishanesinde körüşmege planlaştıra.

Hayser Cemilevni 2013 senesi mayıs 27-de onıñ Bağçasaraydaki evinde yaqalap, o yerde 44 yaşındaki Fevzi Edemovnı babasınıñ tüfeginden öldürgeninde qabaatladılar. Qırım işğal etilgen soñ rusiyeli taqiqat organları onıñ işini yañıdan baqmağa qarar aldı. Hayserni Aqmescit apishanesinden çıqarıp, Krasnodar vilâyetine alıp kettiler.

Rusiye Federatsiyasınıñ Yuqarı mahkemesi Krasnodar ülkesiniñ mahkemesi Hayser Cemilevge bergen 5 yıllıq apis cezasını bir buçuq yılğa qısqarttı. Kiyevniñ Dnepr mahkemesi 2015 senesi aprel ayında onı 3 yıl ve 8 ayğa qadar apiske almağa qarar aldı.

Hayser Cemilev 10 sanlı Astrahan apishanesinde buluna.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG