Link açıqlığı

Saatnıñ esas haberi

İsrail ve Türkiye barışıq aqqında ilân etti


İsrail ve Türkiye munasebetlerniñ eyileşmesi aqqında ilân etti, bu ise, eki Yaqın Şarq devleti arasındaki altı yıllıq ayırılmanıñ soñu olacaqtır, dep bildire Radio Svoboda.

İsrail baş naziri Binyamin Netanyahu Romada bulunıp, iyün 27-de añlaşma Yaqın Şarqta istiqrarğa yol berecegini ilân etti. Onıñ türk zenaatdaşı Binali Yıldırım aynı vaqıtta Ankarada sözde bulunıp, İsrail ile muabbetleşüv aqqında bildirdi.

İyün 27-de ilân etilgen añlaşma boyunca eki devlet bütünley diplomatik munasebetlerni yañıdan tikleycek. İsrail elâk olğanlar ve zararlanğanlarnıñ soy-soplarına tazminat olaraq 20 million dollar töleycek ve Türkiyege Ğazze Sektorında yardım kösterme boyunca bir sıra leyhalarnı ömürge keçirmege izin berecek.

Yıldırımnıñ ilân etkenine köre, añlaşma «esasen» İsrail qamaçavını toqtata, aynı vaqıtta Netanyahu bildirdi ki, qamaçav devam ete, amma İsrailniñ Aşdod şeerindeki limandan Ğazze Sektorına içtimaiy yardım yollamaq mümkün olacaq.

Birleşken Milletler Teşkilâtınıñ baş kâtibi Pan Gi Mun añlaşmanı alğışladı, ve onı «regionda istiqrar içün ümüt bergen işaret» dep, adlandırdı.

Bir vaqıt yaqın ittifaqdaş olğan devlet arasındaki munasebetler altı yıl evel, İsrail arbiy deñiz patruli «Mavı Marmara» paromında doquz Türkiye vatandaşını öldürgen soñ kerginleşti. O vaqıt «Mavı Marmara» gemisi HAMAS tarafından nezaret etilgen İsrailniñ Ğazze Sektorında qamaçavını bozmağa tırıştı.

XS
SM
MD
LG