Aqmescitte keçken sene dekabr ayında yaqınları ğayıp olğanı aqqında bildirgen qıznıñ cesedi tapıldı, dep bildireler Rusiyege boysunğan Taqiqat komitetiniñ Qırım idaresinde.
«2016 senesi iyün 23-te operativ-qıdıruv işleriniñ keçirilmesi çerçivesinde Aqmescit şeeriniñ bir evler azbarındaki inşaat territoriyasında zorbalıq izlerinen qıznıñ cesedi tapıldı. Şimdiki vaqıtta yaş qadınnıñ öldürüvinde 33 yaşındaki yerli sakin şeklenile, o evel cinaiy mesüliyetke celp etilgen edi», – dep aytıla beyanatta.
Müessiseniñ bildirgen malümatına binaen, 2015 senesi dekabr 11-de Qırım uquq qoruyıcı organlarına 21 yaşındaki qıznıñ ana-babası onıñ ğayıp olması aqqında arizanen muracaat etti.
Şimdiki vaqıtta aqay kişiniñ bu cinayetnen bağlı olğanını tasdıqlağan dalillerni toplamaq içün taqiqat işleri alıp barıla. Cinaiy işniñ taqiq etilmesi devam ete, dep qayd ettiler Taqiqat komitetinde.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
