Aqmescitte yerli sakinler rusiyeli Qırım yolbaşçısına bala bağçasını qurıp bitirmege muracaatlarını yaza. Hususan, Zagorodnıy qasabasında qurıp bitirilmegen bala bağçasınıñ inşaat meydanında, demir qorada «Aksönov, bala bağçasını qurıp bitir» yazısı peyda oldı.
Yerli sakinler 2016 senesi mart ayında toqtatılğan inşaatta video yazıp çıqtı ve onı internet ağlarında yerleştirdi. Video müellifleri, obyektni iç kimse qorumağanını, o yerge er istegen kişi maniasız kirip olğanını köstere. Müellifler, qurucılıqta çoq inşaat malzemeleri qalğanını, onıñ bir parçası hırsızlanğanını, bir parçası da bozulğanını köstere.
«Eger de bir yıldan soñ ükümet obyekt hırsızlanılğanını aytsa, iç te şaşmaycaqmız. Böyle etip bücet parası hırsızlana», – dep izaat bere video müellifleri.
Olarnıñ malümatına binaen, bala bağçası ta 2010 senesi qurulıp başladı, onıñ işke tüşürilmesi ise, 2013 senesine belgilengen edi.
Kreml tarafından tayinlengen yarımada yolbaşçısı Sergey Aksönov rusiyeli devlet hadimleriniñ «iş yollanmasınen» yarımadağa kelgeni sebebinden Qırım bala bağçalarına büyük nevbetler olğanını ilân etti.
Onıñ qayd etkenine köre, Qırımda yañı bala bağçalarınıñ işke tüşürilmesi programması işlep çıqarıla, bu ise 10 biñ yerge qadar nevbetni qısqartacaqtır. Bunen beraber, Aksönov böyle programmanıñ ömürge keçirilecek konkret müddetini bildirmedi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
