Link açıqlığı

Saatnıñ esas haberi

Geniçesk rayonında Qırımtatar bayrağı kününe bağışlanğan bir sıra merasimler keçirildi


Geniçesk rayonında Qırımtatar bayrağı künü
Geniçesk rayonında Qırımtatar bayrağı künü

İyün 26-da, Herson vilâyetiniñ Geniçesk rayonında avto yürüş, yarışlar ve kontsert ile Qırımtatar bayrağı künü qayd etildi. Bu aqta Qırım.Aqiqat mühbiri bildire.

Bir sıra merasimler avto yürüşnen başlandı, o rayon merkezi olğan Geniçeskten başlandı ve Novoalekseyevka köyünde yekünlendi. Avtomobil kolonnaları yerli medeniyet evine keldi, bu yerde qırımtatar küreşi boyunca yarışmalar keçirildi. Ğalebe qazanğan kişi baş ediye olaraq qoynı elde etti.

Medeniyet evinde mektepler yanındaki lagerlerniñ ve mektepten aldın oquv yurtlarınıñ balaları azırlağan resim yarışınıñ sergileri taqdim etildi, bundan da ğayrı, qırımtatar halq yaratıcılığı sergisinen tanış olmaq mümkün oldı.

Medeniyet evinde «Bayraq künü» kontserti keçirildi.

Merasim çerçivesinde resim yarışı ğalipleri taqdirlendi, yerli taqımlar ve yırcılar sanada bulundı. Bundan da ğayrı, Qırım Muhtar Cumhuriyeti ve Ukrainada nam qazanğan artist Elzara Batalova seyircilerge onen beraber «Güzel Qırım» türküsini yırlamağa teklif etti.

Yerli akimiyet ve yerli meclis temsilcileri musafirlerni hayırladı.

Kontsertten soñ istegenler köy camisine iftarğa davet etildi.

Qırımtatar bayrağı künü bir qaç yıl evel Qırımda qayd etilip başladı. Bayram künü, 1991 senesi iyün 26-27 künleri Aqmescitte keçirilgen ekinci Qırımtatar Qurultayınıñ ilk künü olğan kün belgilendi.

Qırımtatar bayrağı, üstünde altın tamğa olğan kök tüsteki ketenden ibarettir.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG