Link açıqlığı

Aluşta rayonındaki Aşağı Şuma (Nijnâya Kutuzovka) köyü sakinleri suv meselelerine şikâyet ete ve narazılıq bildirmek içün yolnı qapatmağa azırlana. Bu aqta iyün 24-te yerli «Tvoya gazeta» neşri bildire.

Neşirniñ bildirgenine köre, köyde adamlar endi çoq yıl devamında suv yetmemezliginden qıynala, şimdi ise olarnıñ sabırı yetmey.

«Köyge suv böyle de qattı grafik boyunca berile, bundan da ğayrı, bir qaç kün evel krandan kene de qoñur şingenlik aqtı, o iç te içilgen suvğa oşamay», – dep qayd etile reportajda.

Adamlar şeer yolbaşçılarına ultimatum bildirdi: «Müddet – bir afta. Bu müddet içinde bir şey deñişmese, bütün köynen toplaşamız, qopqalarnen çıqıp, Aqmescit-Aluşta-Yalta yolunı qapatamız».

Kremlge boysunğan yarımada prokuraturasında kütleviy haber vastalarına esaslanıp Aluştada suv keyfiyeti teşkirilip başlağanını bildirdiler.

«İçilgen suv, içilgen ve hocalıq-yaşayış suvınen teminlenmenen bağlı sanitar-epidemiologik talaplarınıñ saqlanması, bundan da ğayrı, suvnen teminlenme hızmeti içün ödeme belgilenmesiniñ doğrulığı teşkirilecek», – dep bildire müessiseniñ matbuat hızmeti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG