İyün 25-te ve aynıñ soñuna qadar Qırımda anomal sıcaq ava olacaq, orta kün ava arareti iklimiy qarardan 7-8 derece yüksek olacaq. Bu atqa Rusiye Fevqulade vaziyetler nazirliginiñ Qırım idaresi bildire.
İyün 25-te Qırımda bulutlı deñişecek ava olacaq, yağmur yağmaycaq. Ava arareti 34 derecege qadar köterilecek.
Qırım uquq qoruyıcıları evlerde salqın ava araretini tutmağa, çoqça suv içmege çağıra.
Yanğın havfsızlığını teminlemek, haber etmek ve orman yanğınlarını vaqtında söndürmek, orman yanğınlarınen bağlı fevqulade vaziyetlerniñ peyda olmasınıñ ögüni almaq maqsadınen Qırımda vatandaşlarnıñ ormanlarda bulunması sıñırlandı, o yerge 21 kün devamında naqliyeniñ kirmesi yasaq etildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
