Link açıqlığı

Qıtayda furtuna: yüzge yaqın insan elâk oldı


Qıtay şarqında qasırğalı yel ve burçaqnen şiddetli furtuna neticesinde eñ azdan 98 kişi elâk oldı, yüzlerce insanlar yaralandı. Felâket iyün 23-te Şanhay şimaline bir qaç saatlıq yol uzaqlığında yerleşken Yançen şeeri yanında yüz berdi, dep bildire Radio Svoboda.

Qıtay haber agentlikleri iyün 24-te bildirdiler ki, yel süratı saatta 78 milânı teşkil ete edi.

İnternette yerleştirilgen fotoresimler bozulğan evler yanında yatqan yaralanğan adamlarnı, çevirilgen maşnalarnı, sındırılğan terekler ve yırtılğan elektrik ağlarını köstere.

Özbekistanda ziyaretnen bulunğan Qıtay Halq Cumhuriyetiniñ reisi Si Tszinpin zararlanğanlarnıñ qurtarılması içün bütün imkânlarnı qullanmağa çağırdı, dep bildire «Sinhua» devlet haber agentligi.

Qıtayda yaz mevsiminde çoq ava felâketleri ola. Keçken sene iyün ayında furtuna sebebinden Yantszı özeninde kruiz gemisi felâketke oğradı, o vaqıt 442 insan elâk oldı.

XS
SM
MD
LG