Rusiye tarafından işğal etilgen Qırımda Qazan tatar milliy-medeniy muhtariyeti qayd etildi, onıñ yolbaşçısı Marat Bagautdinov oldı.
Bu aqta Rusiyege boysunğan Qırım ükümetiniñ Milletlerara munasebetler ve sürgün etilgen vatandaşlarnıñ meseleleri boyunca Devlet komitetiniñ beyanatında bildirile.
«Muhtariyet teşkil etilmesiniñ maqsadı, Qırımda Rusiye Federatsiyası halqlarınıñ biri olaraq Qazan tatarlarınıñ özgünligi saqlanması, til, tasil ve milliy medeniyetniñ inkişaf etmesidir. Yaqın künlerde muhtariyet regional statusını alacaq. Bütün mütenasip vesiqalar endi azır», – dep bildire müessiseniñ matbuat hızmeti Marat Bagautdinovnıñ sözlerini.
Qırım komitetiniñ yolbaşçısı Zaur Smirnovnıñ aytqanına köre, Qırımda endi 12 milliy-medeniy muhtariyet resmiy olaraq qayd etilgen.
«Bugünki künde Qırım Cumhuriyetinde bir sıra milliy-medeniy muhtariyet qayd etilgen, olar Milletlerara munasebetler ve sürgün etilgen vatandaşlarnıñ meseleleri boyunca Devlet komitetinen muvafaqiyetli işbirlik tuta ve devlet destegini ala», – dep ayttı Smirnov.
İyün 12-de Qırım Milletlerara munasebetler ve sürgün etilgen vatandaşlarnıñ meseleleri boyunca Devlet komitetiniñ yolbaşçısı qırımtatar federal milliy-medeniy muhtariyetini teşkil etmek niyeti aqqında ilân etken edi. Onıñ sözlerine köre, böyle teşkilât qırımtatarlarğa özgünlik saqlaması meselelerini çezmege, til, milliy medeniyet, tasil saasında inkişaf etmege yardım etecek, muhtariyet yolbaşçısı ise Milletlerara meseleler boyunca Rusiye prezidenti yanındaki Şurada taqdim etilecek.
Qırımtatar Milliy Meclisinde böyle teşebbüsni «qırımtatar meselelerini ükümetniñ Qırımnıñ tamır halqı aqqında kösterme qayğıruvı divarı artında saqlamaq» ıntıluv, dep adlandırdılar.
2015 senesi iyül ayında Ukraina prezidenti Petro Poroşenko Ukraina Esas qanunına Qırımda qırımtatarlarnıñ milliy muhtariyeti aqqında maddelerni kirsetmege kerek olğanı aqqında ilân etti. O, aynı vaqıtta, halq deputatlarını devlet Anayasasına mütenasip deñişmelerniñ kirsetilmesine qol tutmağa çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
