Link açıqlığı

Saatnıñ esas haberi

Aksönov Qırımnı endi 1,2 million turist ziyaret etkenini bildire


Qırım, illüstratsiya fotoresimi
Qırım, illüstratsiya fotoresimi

Rusiyege boysunğan Qırım yolbaşçısı Sergey Aksönovnıñ qayd etkenine köre, Qırımnı bu sene başından bir millondan ziyade turist ziyaret etti.

Bu aqta o, «RİA Krım» agentligine bergen intervyusında bildirdi.

«Elimizdeki bugünki malümatqa binaen, sene başından Qırımnı 1 200 000 turist ziyaret etti, bu ise, keçken senege köre, 21 fayızğa ziyadedir. Menimce, dinamika eyileşe. Mında kelgenler tabiatımızdan, imkânlarımızdan memnün qala», – dedi Aksönov.

Onıñ alümatına köre, Qırımda raatlanğan kişilerniñ noqta-i nazarını araştırmaq içün faaliyet alıp barıla.

«Biz vaziyetni nezaret astında tutamız, bu yerden ketken turistlerniñ izaatlarını oquymız. Ava limanında ve Keriç paromlı keçitinde turistler neni begenmegenlerini ögrenmek içün içtimaiy sorğular keçirile», – dedi o.

Qırım ükümeti 2016 turistik mevsimi arfesinde bildirdi ki, bu sene Ukrainadan kelecek turistlerniñ sayısı artacağı beklenile. 2014 senesi Qırım işğal etilgen sebebinden Ukraina qıtaiy territoriyasından yarımadağa kelgen turistlerniñ sayısı birden azlaştı, keçken sene ise, raatlanğan ukrain kişileriniñ sayısı umumiy turist sayısından 10 fayıznı teşkil etti.

Qırım kurort ve turizm sabıq naziri Aleksand Liyevniñ bundan evel tahmin etkenine köre, 2016 senesi yarımadanı eñ çoq 1,7 million turist ziyaret etecek. Bunen beraber, o, bularnıñ 99 fayızı Qırımğa Rusiyeden kelecegini qayd etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG