Adliyeci Aleksandr Popkov «Hizb ut-Tahrir» işi boyunca mahküm etilgen Qırım musulmanlarınıñ davası muvafaqiyetli yekünleneceginden şübelene.
Bu aqta o, Qırım.Aqiqat Radiosınıñ saba yayınında bildirdi.
Adliyeciler davanı halqara seviyege çıqarmağa planlaştıra.
«Mahkemede yeñmek, bu davanı yoq etmek güzel bir perspektivadır, amma adaletli bir mahkemede. Rusiyeli mahkemede ise, iç imkân yoqtır, ve biz kene de bütün dünyağa bu balalarğa yapıştırılğan añlaşılmamazlıqnı köstermege tırışacaqmız», – dedi adliyeci.
Aleksandr Popkovnıñ fikrince, «Hizb ut-Tahrir» işi başından siyasiy olğanından sebep, onı çezmege de tek siyasiy ve diplomatik tarafından mümkündir.
Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Episi dört kişi şimdiki vaqıtta Aqmescit apishanesinde buluna.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
