Qırımda «Hizb ut-Tahrir» teşkilâtınen bağlı olğanında qabaatlanğan musulmanlarnıñ işini, cemaatçılıq tavsilâtlı malümatnı bilmesin dep, sırlı yapmağa isteyler, dep bildire iş boyunca qabaatlanğanlardan biriniñ adliyecisi Aleksandr Popkov. Bu aqta o, Qırım.Aqiqat Radiosınıñ yayınında bildirdi.
Adliyeciniñ qayd etkenine köre, taqiqatçılar qabaatlanğanlarnıñ imayecilerine azırlıq taqiqatı malümatını tarqatmamağa tevsiye ete.
«Bütün adliyecilerge azırlıq taqiqatınıñ sırını açmaq mümkün olmaması aqqında haber ettiler. Kerçekten ise, olar bu işni cemaatçılıq saasından almağa isteyler ve adamlarnıñ bu aqta bilmeleri ve laf etmelerini istemeyler», – dep qayd etti Popkov.
FSB-de bu cinaiy iş taqiqatınıñ ceryanına izaat bermeyler.
Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Episi dört kişi şimdiki vaqıtta Aqmescit apishanesinde buluna.
Bundan evel Aqyarda 4 Qırım sakini aynı «Hizb ut-Tahrir» teşkilâtınen bağlı olğanında qabaatlanıp yaqalandı. Şimdiki vaqıtta olarnı Rostov-na-Donu şeerinde mahküm eteler.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
