Kremlge boysunğan işğal etilgen Qırım ükümeti yarımada sakinlerini endiden başlap, büyük istek olacağını beklemeyip, qızdıruv içün odun azırlap qoymağa çağıra. Bu aqta Moskva tarafından tayinlengen yarımada yolbaşçısınıñ muavini Nikolay Yanaki ilân etti.
«Cumhuriyet ükümeti Qırım sakinlerini eñ yaqın vaqıtta qızdırma içün odun satın almağa ve büyük istek olacağını beklememege çağırdı», – dep qayd etti Yanaki «Krımskaya pravda» gazetasına bergen intervyusında.
Nikolay Yanakiniñ aytqan sözlerine binaen, bu sene yerli akimiyetlerge odunnı ertece satın almağa avale etildi.
«Belediyelerge iyül 1-ge qadar odunnen qızdırılğan mektepler, bala bağçaları, hastahaneler aqqında malümat bermekni avale ettim, olar şimdiden odun satın almağa başlasın dep», – dedi Nikolay Yanaki.
Rusiye tarafından işğal etilgen Qırımda 2015 senesi qışta odun az tapılğan mal kategoriyasına keçti, onıñ satın alınmasına nevbet 2017 senesine qadar yazılğan. Yarımadanıñ Rusiye ükümeti yerli sakinlerni odun satın almaqnı sıñırlamağa ya da kömür qullanmağa çağırğan.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
