İyün 21-de, salı künü Qırımtatar resurs merkeziniñ idare reisi Eskender Bariyev ve Ukraina haber siyaseti naziriniñ muavini Emine Ceppar Kiyevde keçirilgen konferentsiyada işğal etilgen Qırımda aq-uquqlarnıñ bozulmasınen oğraşqan merkez işleriniñ neticelerini taqdim ettiler. Olar, alıp barılğan faaliyet, teşkilâtnıñ nevbetteki plan ve maqsatları aqqında añlattılar, dep bildire Qırım.Aqiqat mühbiri.
«Qırımtatar resurs merkezi, bu içtimaiy platforma, onıñ maqsadı, Qırımda aq-uquqları bozulması aqqında malümat toplamaq ve nezaret etmek, uquq qoruyıcı faaliyet, qaide yapıcı ve analitik faaliyetidir. O, yarım yıl evel çalışıp başladı, amma endi büyük neticelerni köstere ve Qırımda yüz bergen bütün bu aqlarnıñ bozulması aqqında haber etmek içün kerek olğan kontentni işlep çıqara», – dep ayttı Ukraina haber siyaseti naziriniñ muavini Emine Ceppar.
Bariyevniñ bildirgenine köre, uquq qoruyıcı faaliyetinden ğayrı, Qırımtatar resurs merkezi daa eki yönelişnen oğraşa.
«Birinci – Qırımnen, qırımtatarlarnen bağlı er angi teşebbüske destek kösterüvdir, bizge adamlar öz fikirlerinen endi muracaat ete. Ekinci yöneliş – qaide yapıcı ve qanun yapıcı faaliyetidir», – dep añlattı o.
Bariyevniñ qayd etkenine köre, teşkilât vazifelerinden biri «Qırımtatar Milliy Meclisiniñ faaliyetine yardım ve destek köstermektir». Merkez vatandaşlar içün maarif, zenaat seminarlarını teşkil ete, cemaat aktsiyalarını azırlay. İş yönelişlerinden biri Qırım siyasiy mabusları aqqında kitapçıqlarnıñ neşir etilmesi oldı.
Böyle risale rus ve ingliz tillerinde neşir etilgen, türk tilinde malümatnıñ azırlanması boyunca işler alıp barıla. Bariyevniñ qayd etkenine köre, Türkiyedeki qırımtatar diasporası Qırımdaki vaziyet aqqında malümatqa muhtac.
Bundan da ğayrı, merkez Qırım işğali devamında belgisiz ğayıp olğan ve elâk olğan kişiler aqqında malümatnı bildirgen kitapçıqnı azırladı. Şimdiki vaqıtta merkez mutehassısları Qırım insan aqları evi teşkil etilmesi fikrini işlep çıqara.
Qırımtatar resurs merkezi Ukrainada 2015 senesi noyabr ayında cemaat teşkilâtı olaraq qayd etildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
