Avropa Birligi elçileri Rusiyege qarşı iqtisadiy sanktsiyalarnı daa yarım yılğa, yanvar 31-ge qadar uzattırmaq qararına keldi, dep bildire Radio Svoboda.
Bu aqta, beklenilgenine köre, kelecek afta Brüsselde keçirilecek Avropa Birligi liderleri sammitinde resmiy şekilde ilân etilecek.
Rusiyege qarşı sanktsiyalarnıñ uzattırılması meselesi AB aza-devletleri arasında farqlı tüşüncelerni doğura. Bu vaqıtqa qadar Almaniya kantsleri Angela Merkel ittifaqdaşlarını sanktsiyalarğa qol tutmağa çağıra edi, amma Slovakiya, Macaristan ve İtaliya kibi devletlerniñ Rusiyege qarşı sanktsiyalar siyasetinen bağlı ayrı fikirleri bar.
Avropa komissiyası reisi Jan-Klod Yunker iyün 20-de «Euronews» avropalı agentligine bergen intervyusında tahmin etti ki, Rusiyege qarşı sanktsiyalar yaqın künlerde daa yarım yılğa uzattırılacaq, bundan soñ olarnı, Moskvanıñ Minsk añlaşmalarını ömürge keçirecegine köre, yavaş-yavaş toqtatacaqlar.
Şimdiki vaqıtta Avropa Birligi yolbaşçılığı ve aza-devletleriniñ, bundan da ğayrı, AQŞ yolbaşçılığı ve «Yedi gruppası» diger devletleriniñ resmiy noqta-i nazarı şu ki, Rusiyege qarşı, onıñ Ukraina şarqında alıp barğan zorbalıq areketleri sebebinden, sanktsiyalar tek Minsk añlaşmalarınıñ bütünley ömürge keçirilgen soñ toqtatıla bile.
Keçken cuma künü Evropa Birligi Rusiyege qarşı bir qaç paketten biri olğan diger sanktsiyalarnı daa bir yılğa uzattırdı, bu, Rusiye tarafından işğal etilgen Qırım ile munasebetlerge sıñırlanma kirsete. AB, AQŞ ve «Yedi gruppası» devletleri kibi, bildire ki, «Qırım» sanktsiyaları yarımadanıñ azat etilecegine qadar devam etecek.
