Herson vilâyetindeki Geniçesk rayonında Qırımtatar bayrağı kününe bağışlanğan bir sıra merasimlerniñ keçirilmesi planlaştırıla. Bu aqta Qırım.Aqiqatqa Geniçesk rayon devlet memuriyetiniñ yolbaşçı muavini Gulnara Bekirova bildirdi.
Hususan, Geniçeskten ve Partizanı köyünden Novoalekseyevka köyüne avto yürüş teşkil etilecek.
Bekirovanıñ qayd etkenine köre, merasimde iştirak etmege istegenler saat 17:00 Geniçesk demiryol vokzalı yanında toplaşacaq. Avtomobil kolonnaları Harkov-Aqmescit yolunda saat 17:20 birleşecek ve Novoalekseyevka medeniyet evine areket etecek.
Novoalekseyevkada vetanperver aqşamı, «Bayraq künü» kontserti teşkil etilecek ve camide iftar keçirilecek. Novoalekseyevkada «Bayraq künü – bir devlet» aktsiyası keçirilecek, o yerde eki, ukrain ve qırımtatar, bayraq açılacaq.
Gulnara Bekirovanıñ sözlerine köre, Bayraq künü, avto yürüşten ğayrı, «Er evge bayraq» aktsiyası, balalar arasında resim yarışı, qırımtatar halq yaratıcılığı sergisi teşkil etilecek.
İyün 26-da qayd etilgen Qırımtatar bayrağı kününe bağışlanğan merasimler Kiyevde de keçirilecek. Programma çerçivesinde resim yarışı, avto yürüş ve vatanperverlik mitingi teşkil etilecek.
Qırımtatar bayrağı künü bir qaç yıl evel Qırımda qayd etilip başladı. Bayram künü, 1991 senesi iyün 26-27 künleri Aqmescitte keçirilgen ekinci Qırımtatar Qurultayınıñ ilk künü olğan kün belgilendi.
Qırımtatar bayrağı, üstünde altın tamğa olğan kök tüsteki ketenden ibarettir.
