Link açıqlığı

Ukraina Devlet sıñır hızmeti: Qırımğa sahte pasportlarnen keçmege tırışalar


Memuriy sıñır, arhiv fotoresimi

İşğal etilgen Qırım ile memuriy sıñırda yerleşken «Kalançak» kiriş-çıqış nezaret noqtasında Herson otrâdınıñ sıñırcıları iyün 20-de, vesiqa teşkergen vaqıtta, yarımadağa Ukraina vatandaşı sahte pasportları vastasınen keçmege tırışqan eki kişini belgiledi, dep bildire Ukraina Devlet sıñır hızmeti.

Müessisede qayd etilgenine köre, yaqalanğan kişiler Rusiye ve Beyaz Rusiye vatandaşları ola.

«Teşkerüv tedbirleriniñ neticesinde yaqalanğan şahıslar Rusiye Federatsiyası vatandaşı olğan erkek kişi ve Beyaz Rusiye vatandaşı olğan qadın kişi olğanı belgilendi. Olarnıñ sözlerine köre, Ukraina vatandaşı pasportlarını olar, Odessada 200 dollar AQŞ fiyatınen aldı ve Qırımğa anda yaşamaq içün keçmege tırıştı. Bundan da ğayrı, olarnıñ Rusiyede büyük para borcu bar olğanı belgilendi», – dep aytıla beyanatta.

Ukrain sıñırcıları yaqalanğan kişilerni Milliy politsiya hadimlerine teslim etti.

Video: Ukraina Devlet sıñır hızmeti

2014 senesi Qırım Rusiye tarafından işğal etilgen soñ qıtaiy Ukraina ve yarımada arasında resmiy şekilde – memuriy, amelde ise – aqiqiy bir sınır peyda oldı. Memuriy sıñırda üç kiriş-çıqış noqtası çalışmaqta – «Kalançak», «Çonğar» ve «Çaplınka».

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG