Link açıqlığı

Kiyevde Qırım ve Donbassta medeniy asabalıq saqlavı boyunca «tögerek masa» keçirilecek


Bağçasaray Hansarayı, arhiv fotoresimi

İyün 21-de, salı künü Kiyevde vaqtınca işğal etilgen territoriyalarda medeniy asabalıq saqlavı boyunca «tögerek masa» keçirmege planlaştıralar.

Teşkilâtçılarnıñ malümatına köre, merasimniñ esas maqsadı Lugansk, Donetsk vilâyetleriniñ vaqtınca işğal etilgen territoriyalarda ve Rusiye tarafından işğal etilgen Qırımda medeniy asabalıq obyektlerini saqlav boyunca devlet ve cemaatçılıqnıñ beraberlikte yapacaq kerekli faaliyetiniñ işlep çıqarılmasıdır.

«Tögerek masa» Qırım reintegratsiyası ve işğalden azat etilmesi meselelerinen bağlı haber kampaniyasınıñ qaviyleştirilmesi boyunca Ukrain buhran media merkeziniñ teşebbüsi çerçivesinde teşkil etile.

Planğa köre, merasimde Ukraina Medeniyet nazirlgi, Adliye nazirligi, Vaqtınca işğal etilgen territoriyalar meseleleri boyunca nazirlik, Tışqı işler nazirligi, bundan da ğayrı, Abideler ve itibarğa lâyıq yerler meseleleri boyunca Halqara şurasınıñ Ukrain milliy komiteti, «Müzey işi inkişafı ukrain merkezi» temsilcileri iştirak etecek.

«Tögerek masa» saat 14:00-te Ukrain buhran media merkezinde başlanacaq.

Ukraina Medeniyet nazirliginiñ bildirgen malümatına binaen, devletniñ vaqtınca işğal etilgen territoriyalarında 99 müzey bar, o yerde eki millionğa qadar eksponat buluna.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG