Ukrain vatandaşı Nadejda Savçenko Rusiyede apiste bulunğan vaqıtta onıñ imayecilerinden biri olğan rusiyeli adliyeci Mark Feygin Qırımtatar Milliy Meclisi reis muavini «İlmi Umerovnı imaye etecegini» bildirdi.
«Onı Cinaiy Kodeksi 280.1 maddesiniñ 2-ci qısmı (Rusiye bütünligini bozuvınen bağlı areketlerni yapmaq halq ögünde çağıruv) boyunca qabaatlaylar. Biz Nikolay Polozov (Ahtem Çiygoz ve Hayser Cemilevni imaye etken) ve Qırımdaki zenaatdaşlarırmız ile işimizni başlaymız. Yaqında anda baracam, amma men yardımğa muhtacım. Büyük yardımğa. Bu aqta birazdan haber eterim», – dep yazdı Feygin iyün 20-de Facebook saifesinde.
Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı. Umerovniñ bildirgenine köre, onıñ işi çerçivesinde Rusiye Federal havfsızlıq hızmeti onı psihiatrik ekspertizadan keçtirmege niyetlene.
Mayıs 19-da Qırımtatar Milliy Meclisiniñ reis muavini İlmi Umerovğa rusiyeli Federal havfsızlıq hızmetiniñ Qırım idaresinde sorğudan soñ qabaatlavnı taqdim ettiler.
Mayıs 12-de onıñ evinde tintüv keçirildi, Rusiye FSB-niñ Qırım idaresiniñ taqiqatçısı oña çıqmamaq şartını bildirgen vesiqanı berdi. Bundan soñ taqiqatçılar İlmi Umerovnı iş malümatını faş etmemesi aqqında imza qoymağa mecbur ettiler. Sorğuğa onıñ apayı ve balaları da çekilgen edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
