Qırımtatarlarnıñ lideri Mustafa Cemilev musulman devletlerini Qırımnıñ Rusiye tarafından qanunsız işğaline ve yarımadada insan aqları bozuluvına pervasız olğanları içün yüzledi, dep bildire «Anadolu» agentligi.
Agentlikke bergen intervyusında Cemilev qayd etti ki, qırımtatarlar Qırım işğaliniñ birinci kününden başlap Rusiye tarafından basqıncılıqqa oğratıla.
«Rusiyeden Qırımğa 15 biñ devlet memurı yollanıldı, Aqyardaki rusiyeli bazada 80 biñ Rusiye askeri buluna, yarımadağa kelgen rus ealiniñ umumiy sayısı ise, vatandaş şahısları ve askerlernen beraber, 200 biñ insannı teşkil ete», – dep ayttı qırımtatar halqınıñ lideri.
Cemilev Cenevrede Birleşken Milletler Teşkilâtı İnsan aqları boyunca şurasınıñ 32-ci toplaşuvında iştirak etmek içün buluna.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
