Rusiye tarafından işğal etilgen Qırımda rusiyeli millet birdemliginiñ qaviyleştirilmesi meseleleri boyunca seminar keçireler. Bu aqta Kremlge boysunğan yarımada ükümetiniñ Medeniyet nazirligi bildire.
«Qırım cumhuriyeti medeniyet naziri Arina Novoselskayanıñ fikrince, tek medeniyet rusiyelilerniñ umummilliy birdemligini teminley bile», – dep qayd ettiler müessisede.
Merasimde medeniyet ve sanat saasındaki müessiseler ve teşkilâtlar, Rusiye Federatsiyası subyektleri icra ükümeti organlarınıñ temsilcileri iştirak ete.
Seminar iştirakçileri içün Qırım halqlarınıñ bayram adetleri taqdim etildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
