Link açıqlığı

Qırımtatar Milliy Meclisiniñ reis muavini İlmi Umerovniñ bildirgenine köre, onıñ «separatizm aqqında» işi çerçivesinde Rusiye Federal havfsızlıq hızmeti onı psihiatrik ekspertizadan keçtirmege niyetlene. Bu aqta İlmi Umerov Facebook saifesinde yazdı.

«Bugün nevbetteki sefer FSB taqiqatçısında edim. Bu sefer psihiatrik ekspertiza keçirilmesi aqqında ferman ile tanıştırdılar. Bu ne vaqıt ve ne yerde keçecegi aqqındaki malümatnı soñ bildirecekler. Vesiqa mündericesini bildirmeyim, çünki «faş etmeme aqqında» imza qoyğan edim, bundan da ğayrı, meni tek tanıştırdılar, yani taqdim etmediler», – dep añlattı Meclis reisiniñ muavini.

Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.

Mayıs 19-da Qırımtatar Milliy Meclisiniñ reis muavini İlmi Umerovğa rusiyeli Federal havfsızlıq hızmetiniñ Qırım idaresinde sorğudan soñ qabaatlavnı taqdim ettiler.

Mayıs 12-de onıñ evinde tintüv keçirildi, Rusiye FSB-niñ Qırım idaresiniñ taqiqatçısı oña çıqmamaq şartını bildirgen vesiqanı berdi. Bundan soñ taqiqatçılar İlmi Umerovnı iş malümatını faş etmemesi aqqında imza qoymağa mecbur ettiler.

Sorğuğa onıñ apayı ve balaları da çekilgen edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG