Rusiye prezidenti Vladimir Putin rusiyeli Devlet Dumasına saylavlarnıñ 2016 senesi sentâbr 18-de keçirilmesi aqqında fermannı imzaladı. Bu aqta iyün 17-de, cuma künü Kreml matbuat hızmeti bildirdi.
Vesiqada ferman onıñ resmiy derc etilecek künü işke tüşürilecegi aqqında qayd etile. O, devlet yolbaşçısı tarafından imzalanğan soñ 5 kün içinde derc etilmek kerek. Resmiy olaraq derc etilgen soñ, Rusiyede federal saylavaldı kampaniyası başlana.
Yedinci çağıruv Devlet Dumasına saylavlar rey berüv bir kününde keçirilecek. Saylavlar qarışıq sistema boyunca teşkil etilecek: 225 deputat firqa cedvelleri boyunca, 225 deputat bir mandatlı okruglar boyunca saylanacaq. Bundan da ğayrı, yedinci çağıruv rusiyeli parlamentine 5 fayızlı (bundan evel olğan 7 fayız yerine) manianı keçken firqalar keçecek.
Rusiye prezidentiniñ matbuat kâtibi Dmitriy Peskovnıñ «İnterfaks» agentligine bildirgenine köre, iyün 22-de Vladimir Putin ameldeki terkip işni yekünlegeni munasebetinen Devlet Dumasını ziyaret etecek.
