Kremlge boysunğan Qırım ükümetiniñ yolbaşçısı Sergey Aksönov Peterburg halqara iqtisadiy forumında Thomas Vendome Investment frenk yatırım şirketiniñ reisi Jan-Pyer Tomanı onıñ Rusiye ve işğal etilgen Qırımğa nisbeten «printsipial dostane noqta-i nazarı» içün teşekkür bildirdi.
Bu aqta Aksönovnıñ matbuat hızmeti bildire.
«Onıñ şahsiy noqta-i nazarınıñ Frenkistan Cumhuriyeti parlamenti Rusiyege qarşı sanktsiyalarnıñ yımşatılmasında büyük rolü oldı. Ürmetli insanlar kelse ve soñ öz devletinde Qırımda aqiqaten neler olğanını añlatsa, bunıñ qıymeti büyüktir. Eminim ki, böyle dostlar olğanda Rusiye ve Qırımğa iç bir şeyden qorqmaq keregi yoq. Toma efendige temenna etemiz, noqta-i nazarıñız içün sağ oluñız», – dep ayttı Aksönov.
İyün başında Frenkistan parlamentiniñ yuqarı palatası, Senat, Rusiyege qarşı iqtisadiy sanktsiyalarnı baqıp çıqmaq ve Moskvanen muzakereler keçirilmesine irişmek teklif etken qararnı qabul etti. Bu qarar tevsiye şeklini taşıy. Amma Brüsselde diplomatik menbalarnıñ ilân etkenlerine köre, Frenkistanda ve Avropa birliginiñ diger devletlerinde «Putinniñ dostları» yapqan ğayretlerine baqmadan, iyün soñunda Rusiyege qarşı sanktsiyalar yarım yılğa uzattırılacaq ve iç yımşatılmaycaq.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
