Link açıqlığı

Saatnıñ esas haberi

Qırım abituriyentlerine Rusiye aliy oquv yurtlarında bücet yerlerini ayırmağa vade eteler


İllüstratsiya fotoresimi
İllüstratsiya fotoresimi

Kremlge boysunğan Qırım tasil ve ilim nazirliginde bildireler ki, 2016 senesi Qırım abituriyentleri içün aliy oquv yurtlarına kiriş qolaylaştırılacaq.

Nazirlikniñ matbuat hızmetiniñ bildirgenine köre, rusiyeli aliy oquv yurtlarında qırımlılar içün ayırı, tek Qırım sakinleri qabul etilecek yerler ayırıla. Bundan da ğayrı, yarımada abituriyentleri öz isteginen umumiy bücet yerlerine, ayırı qabul etüv şartları olmadan, kire bile, dep qayd ettiler müessisede.

Qırım tasil nazirliginde aytqanlarına binaen, abituriyent bakalavr ve mütehassıs programmaları boyunca tasil almaq içün birden eñ çoq 5 aliy oquv yurtuna ariza bere bile.

Şu vaqıt Ukrainada işğal etilgen Qırım mezunları içün haber kampaniyası işlep çıqarıldı. Böyleliknen, abituriyentler olarnı meraqlandırğan malümatnı kütleviy haber vastaları (işğal etilgen territoriyada da tarqatılğan) ve «yol haritası» vastasınen ala bile.

Bugünki künde Qırım sakinlerine, evel olğanı kibi, VNO (Tışqı mustaqil bilgige qıymet kesüv) bermege teklif eteler, ve yaqında VNO sessiyasından keçmeden ukrain aliy oquv yurtuna kirmege imkân peyda oldı.

VNO-2016 esas sessiyası mayıs 5-te ukrain tili ve edebiyatı boyunca testnen başlandı ve iyün 17-ge qadar devam etecek. İşğal etilgen Qırım abituriyentleri içün, Ukraina qıtaiy qısmında VNO-dan belgilengen müddet devamında keçmege yetiştirmegen olsalar, ayırı tarih belgilendi – iyül 4-12 künleri.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG