Link açıqlığı

Saatnıñ esas haberi

Aksönov Peterburg halqara iqtisadiy forumında Qırım aqqında añlattı


Sergey Aksönov, arhiv fotoresimi
Sergey Aksönov, arhiv fotoresimi

Peterburg halqara iqtisadiy forumı çerçivesinde «inkişafnıñ perspektiv yönelişlerinde büyük yatırım leyhalarını taqdim etmek maqsadınen» ilk sefer Qırım stendi taqdim etildi. Bu aqta Kremlge boysunğan Qırım ükümetiniñ yolbaşçısı Sergey Aksönov bildirdi.

Ükümet matbuat hızmetiniñ bildirgenine köre, Qırım yatırım portalınıñ taqdimi de teşkil etildi.

«Yatırımcılardan er biri, stendimizniñ yanına kelip, interaktiv levhada malümat ala bile, bu yerde iqtisadiy bölük içün mesüliyetli olğan resmiy şahıslarnen qonuşa bile. Bu saada esas muvafaqiyetlerden biri, yatırım añlaşmalarınıñ imzalanmasınen bağlı bütün vesiqalarnıñ uyğunlaştırılması müddetini maksimum qısqartqanımız oldı, dep sayamız, o 30 künden ibaret. Aynı bu müddet devamında tehnikiy şartlarnıñ berilmesinen bağlı meseleler uyğunlaştırılacaq. Biznes faaliyetini alıp barmaq içün maksimum yahşı şarait qurmağa tırışamız», – dep ayttı Aksönov.

Peterburg halqara iqtisadiy forumı Rusiyede endi 20-ci kere keçirile. 2006 senesinden başlap forum Rusiye Federatsiyası prezidenti Vladimir Putinniñ iştiragi ile keçirile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG