Qırım boyunca parlament diñlemeleriniñ iştirakçısı, «Qırımnıñ işğalden azat etilmesi meselesi boyunca Halqara merkez» müdiri, Qırımtatar Qurultayı delegatı Emine Bagatırlınıñ qayd etkenine köre, Qırım reintegratsiya strategiyası aqqında yarımadanıñ işğalden azat etilmesinden soñ laf etmek kerek. Bu aqta «Qırımnıñ işğalden azat etilmesi meselesi boyunca Halqara merkez» müdiriniñ matbuat hızmeti bildire.
«Eñ evelâ, ukrain devletiniñ Qırım Muhtar Cumhuriyetiniñ işğalden azat etilmesi (reintegratsiya degil) ve onıñ Ukraina nezaretine qaytarılması boyunca areketleriniñ tertibini belgilegen yekâne strategiya vesiqasını işlep çıqarmasına diqqat etmek kerek. Bunıñ içün, müddet oyunını oynamaq degil de, amma aqiqatqa uyğan ifadelerni qullanmaq teklif etile», – dep qayd etti ekspert.
Emine Bagatırlınıñ fikrince, bu ağır vaqıtta icra ükümeti organlarınıñ işleri çoq, bu cümleden, o, işğal etilgen territoriyalar meseleleri boyunca endi bar olğan planlarını ve niyetlerini ömürge keçirmeli.
İyün 15-te Ukraina Yuqarı Radasınıñ sessiya zalında nevbetteki mevzu boyunca parlament diñlemeleri keçirildi: «Ukrainada Qırım Muhtar Cumhuriyeti ve Aqyar şeeri vaqtınca işğal etilgen territoriyasında reintegratsiya strategiyası: meseleler, yollar, usullar ve ıntıluvlar».
Toplaşuv neticesinde Ukraina ükümetiniñ nevbetteki adımları boyunca konkret tevsiyeler işlep çıqarılacaq.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
