Rusiye prezidenti Vladimir Putin iyün 16-da Avropa komissiyası reisi Jan-Klod Yunker ile körüşecektir. Körüşüv Rusiyedeki Sankt-Peterburg şeerinde, halqara iqtisadiy forumda keçirilmek kerek.
Körüşüvniñ ola bilecek mevzularından biri – Rusiye ve Avropa Birligi arasındaki munasebetler, Rusiyege qarşı sanktsiyalar ve Moskvanıñ cevaplı areketleri, Avropa Birliginiñ migratsiya buhranıdır, dep bildirdi Kreml temsilcisi Yuriy Uşakov.
Bundan da ğayrı, Putin ve Yunker halqara meselelerni, hususan Ukraina ve Süriyede barışıq şeklinde vaziyetniñ eyileştirilmesi meselesini muzakere ete bile.
Bundan da ğayrı, energetika meseleleri boyunca söz yürsetilecektir.
Yunkernen körüşeceginden soñ, Putin Birleşken Milletler Teşkilâtınıñ baş kâtibi Pan Gi Mun ile körüşmek kerek.
Mayıs ayında Yunkerniñ temsilcisi Margaritis Shinas ilân etti ki, Avropa komissiyası prezidenti Rusiyede bulunacaq vaqıt bugünki rusiyeli-avropalı munasebetlerniñ kelecegi meselesini meydanğa ketirmege niyetlene.
Lâkin, spikerniñ sözlerine köre, Yunkerniñ Rusiyege qarşı sanktsiyalar boyunca noqta-i nazarı deñişmeyip qala: olarnıñ müddeti Minsk añlaşmalarınıñ ömürge keçirilmesinen ve Ukraina suverenitetine ürmetnen bağlıdır.
Jan-Klod Yunker Rusiyeni Avropa birligi sammitinden evel ziyaret etecek. İşbu sammitte Moskvağa qarşı, Qırımnıñ qanunsız işğali ve Ukrainadaki Donbassta alıp barğan faaliyeti içün, sanktsiyalar boyunca qarar alınacaq.
