Link açıqlığı

Saatnıñ esas haberi

Rusiyeli mahkemede Qırım musulmanları işi boyunca şaatlarnı soğruğa çekmege devam eteler


Rusiye, Rostov-na-Donu, qırımlı «Hizb ut-Tahrir» işi boyunca mahkeme
Rusiye, Rostov-na-Donu, qırımlı «Hizb ut-Tahrir» işi boyunca mahkeme

İyün 16-da Rostov-na-Donu şeerindeki Şimaliy Qavqaz okrug arbiy mahkemesi «Hizb ut-Tahrir» işini baqmağa devam ete. Bu aqta Qırım.Aqiqat mühbiri bildire.

Toplaşuv yarım saat keç başlandı.

Cumaaqşamı künü şaatlarnı sorğuğa çekmege devam eteler. Olardan biri, Ayder Osmanov, Ruslan Zeytullayevni ve Ferat Sayfullayevni tanığanını qayd ete, olarnıñ episi Aqyar civarındaki Baydar (Orlinoye) köyünden ola.

Mahküm etilgenler «Hizb ut-Tahrir» teşkilâtınıñ azaları olğanı aqqında malümat qaydan belli olğanı mahkemeciniñ sualine Osmanov böyle cevap berdi: «Bunı köyde er kes bile, er kes bunı laf ete».

İyün 15-te mahkemede Aleksandr taqma adlı «sırlı» şaat sorğuğa çekildi.

Rostov-na-Donu şeerindeki Şimaliy Qavqaz okrug arbiy mahkemesi iyün 1-de dört Qırım musulmanı – Ferat Sayfullayev, Nuri (Yuriy) Primov, Rustem Vaitov, Ruslan Zeytullayevge qarşı cinaiy işni baqmağa başladı. Bu toplaşuvda prokuror olarğa qabaatlav neticesini oqudı. Qabaatlanğan Qırım sakinleri 2015 senesi Aqyar şeerinde yaqalandı. Taqiqatnıñ noqta-i nazarına binaen, olar «Hizb ut-Tahrir» teşkilâtınıñ iştirakçileri ola.

«Hizb ut-Tahrir» – halqara islâm siyasiy firqasıdır. Onıñ resmiy maqsadı islâm devletini ve musulman yaşayış tarzını qurmaqtır. Bu teşkilât Rusiye, Qazahistan ve Almaniyada yasaq etildi; Ukraina ve diger memleketlerde onıñ faaliyeti qanun boyunca keçirile bile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG