Rusiye Federatsiyası mudafaa naziri Sergey Şoygu cumaaqşamı künü işğal etilgen Qırımğa keldi, dep bildire TASS agentligi.
Rusiyeli haber agentliginiñ malümatına binaen, Rusiye arbiy müessisesiniñ yolbaşçısı arbiy infrastruktura qurucılığı aqqında maruzalarnı diñleycek ve Saq şeerinde arbiy sanatoriyni teşkerecek. Bu aqta mühbirlerge Mudafaa nazirliginiñ resmiy temsilcisi İgor Konaşenkov bildirdi.
«Rusiyeli arbiy müessisesiniñ yolbaşçısı Cenübiy arbiy okrug ve Qara deñiz flotunıñ komandanlığını arbiy infrastruktura obyektleriniñ quruvı boyunca planlarnıñ ömürge keçirilmesi aqqında diñleycek», – dep ayttı Konaşenkov.
Bundan da ğayrı, onıñ sözlerine binaen, nazir Aqyarnı ziyaret etecek, o yerde Qara deñiz flotunıñ deñiz piyade askerleri ayırı brigadasına mükâfatnı taqdim etecek.
Planğa köre, Şoygu 2014 senesi Mudafaa nazirliginiñ mülkiyetine keçken Saqtaki şifahaneni de ziyaret etecek.
Rusiye Mudafaa nazirligi saytında Sergey Şoygunıñ yarımadağa ziyareti aqqında malümat yoq.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
