Link açıqlığı

Qırımda sürgün etilgenler içün evler quruvına ayırılğan bücet parasını qullanmağa yetiştirmeyler


Remzi İlyasov

Sürgün etilgenler içün evler qurmasına bu sene ayırılğan bücet parası qullanılmayıp qala bile, dep saya Kremlge boysunğan Qırım parlamenti yolbaşçısınıñ muavini Remzi İlyasov.

«Keçken sene Bağçasaray şeerinde ve Borçoqraq qasabasında (Aqmescit – QA) evler işke tüşürildi. Amma bu yeterli degil, vatandaşlarnı qabul etkende bir çoq muracaat hususan bu meselenen bağlı. Onı mecbüriy şekilde ve ilk sırada çezmek kerek, çünki evlerniñ quruvına milliard rubleden ziyade miqdarında ayırılğan para bu seneniñ soñuna qadar bütünley qullanılmaz» – dep bildire İlyasovnıñ sözlerini yarımada parlamentiniñ matbuat hızmeti.

Müessisede qayd etilgenine köre, İlyasov, kelecek sene sürgün etilgenler içün iç bir obyekt qurulmaycaq, dep qorqa.

Keçken sene Rusiye tarafından işğal etilgen Qırımda sürgün etilgenlerniñ teminlenmesi programması boyunca bücet parasını qullanmağa yetiştirmegen ediler. 2015 senesi vatanğa qaytqanlarnıñ teminlenmesine ayırılğan paradan 8%-dan biraz ziyade qullanıldı.

Yarımadanıñ ameldeki ükümeti Qırım bücet parasını qullanmağa yetiştirmegenini bildirgen edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG