Ukraina qıtaiy territoriyasında Qırım sakinleri içün doğma şeadetnamesi aluvını qolaylaştırmaq kerek: Rusiye tarafından işğal etilgen Qırım sakinleriniñ vesiqalarınen mahkemeler degil de, memurlar oğraşmalı. Böyle fikirni Qırım.Aqiqat Radiosınıñ aqşam yayınında «Qırım-SOS» cemaat teşkilâtınıñ idarecisi Tamila Taşeva bildirdi.
«Mesele tek (köçüci – QA) malümat kâğıtında degil de, meselâ, bala işğal etilgen territoriyada doğğan olsa, añlaşıla ki, onı o yerden alıp ketirmek içün oña ukrain vesiqalarını almaq kerek. Bu mesele şimdiki vaqıtta tek mahkemede çezile, biz ise aytamız ki, adamlarğa yardım etmege isteseñiz, memuriy protseduranı qolaylaştırıñız», – dep qayd etti Taşeva.
Cemaat faaliniñ aytqanına köre, Qırım sakinleri içün Ukrainanıñ tek maneviy destegi yeterli degil: devlet, işğal etilgen yarımada sakinlerinen çalışma sistemasını zemaneviyleştirmek kerek.
«Bu, biznes açması, vesiqa alması, mahkeme qararlarını almanen bağlı çeşit protseduralarnıñ qolaylaştırılması meseleleridir, çünki bazı şeyler bar ki, hususan Qırım sakinleri içün bu ğayet ağır ve problematiktir», – dedi Taşeva.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
