Link açıqlığı

Qırım vatandaş qamaçavınıñ teşebbüsçilerinden biri olğan, ATR telekanalınıñ baş müdiri Lenur İslâmov Qırım reintegratsiyası boyunca parlament diñlemelerinde teşkil etilgen qırımtatar batalyonına arbiy bölük nomerasınıñ berilmesini talap etti.

«Prezidentniñ bizge arbiy bölük nomerasını bermesini talap etem. Bu, arbiy bölükniñ Qırım nomerasıdır, çünki biz Qırımdan masqara olıp ketken bölüklerge namusını qaytarmaq da kerekmiz, Qırımğa namusnen qaytmaq kerekmiz», – dedi o.

İyün 15-te, çarşenbe künü Ukraina Yuqarı Radasınıñ sessiya zalında nevbetteki mevzu boyunca parlament diñlemeleri keçirile: «Ukrainada Qırım Muhtar Cumhuriyeti ve Aqyar şeeri vaqtınca işğal etilgen territoriyasında reintegratsiya strategiyası: meseleler, yollar, usullar ve ıntıluvlar». Zalda parlament prezidiumı divarına qırımtatar bayrağı asılğan.

Lenur İslâmov bu bayraqnı çıqarmamağa çağırdı ki, bayraq «bütün Ukraina deputatlarına Qırım – qaytarmaq kerek olğan Ukraina terkibinde qırımtatar muhtariyeti olğanını hatırlatsın» dep.

Ukraina uquq qoruyıcı organlarınıñ terkibinde qırımtatar batalyonınıñ teşkil etilmesi boyunca muzakereler keçken seneden başlap devam ete. Mecliste bu mesele boyunca bütün malümat Ukraina prezidenti Petro Poroşenkoğa ve İçki işler nazirligi yolbaşçısı Arsen Avakovğa teslim etilgeni aqqında bildire ediler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG