Link açıqlığı

Rusiye parlamentiniñ yuqarı palatası olğan Federatsiya şurası Yuriy Çaykanı daa 5 yıllıq müddetke Rusiye baş prokurorı vazifesine tayinledi. Böyle qarar iyün 15-te qabul etildi, dep bildire Radio Svoboda.

İyün 15-te saba Federatsiya şurası yanında Moskvada politsiya muhalif Leonid Volkovnı Çaykanıñ yañıdan bu vazifege tayinlenmesine qarşı bir kişilik piket keçirmege ıntıluvı içün yaqaladı. Bundan da ğayrı, fotograf Pelagiya Zamatina, faal Nikolay Lâskin, Qabarcılıqqa qarşı küreş fondunıñ adliyecisi Vitaliy Serukanov ve qayd etilmegen «Progress partiyası» azası Yevgeniy Zamâtin tutıldı. Vaqıt keçken soñ, olar yiberildi.

Rusiye baş prokurorı Yuriy Çayka Qabarcılıqqa qarşı küreş fondunıñ taqiqatı derc etilgen soñ kütleviy haber vastalarınıñ diqqatını celp etti. Taqiqat müellifleri onıñ ailesi azalarını ve diger yüksek dereceli prokuratura hadimlerini qabarcılıqta ve cinaiy taqımlarnen bağ tutqanında qabaatladı.

Çayka ise, bu taqiqat yalan olğanını ayttı ve o, britaniyalı iş adamı Uilyam Brauder, AQŞ-de «Magnitskiy qanunı» qabul etilmesiniñ teşebbüsçilerinden biri olğan Hermitage Capital fondunıñ reisi tarafından sımarlanğanını ilân etti. Qabarcılıqqa qarşı küreş fondu Çaykanı bir qaç kere mesüliyetke çekmege tırışqan edi. Amma er sefer mahkeme Fondnıñ arizalarını red ete edi.

XS
SM
MD
LG