Rusiyege boysunğan Qırım ükümetiniñ baş nazir muavini Ruslan Balbekniñ ilân etkenine köre, 2017 senesi Bağçasaray rayonındaki Süyren köyünde sürgünlik qurbanlarına bağışlanğan abide kompleksiniñ inşaatı boyunca esas işlerniñ yapılması planlaştırıla.
Bu aqta rusiyeli Qırım ükümetiniñ matbuat hızmeti bildire.
«Yapıcı belgilenecek ve konkurs keçirilecek. Yapıcınıñ esas vazifesi, abide kompleksiniñ inşaatına ayırılğan maksimal müddeti – 2 yıl içinde yapılacaq qurucılıq işleriniñ plan-grafigini tizmektir. Birinci nevbette turğan territoriyanıñ teminlenmesi ve «ticariy» vagon maket-nushası qoyulması endi bu sene yapıldı. Bekleymiz ki, kelecek sene işlerniñ esas qısmı yapılacaqtır», – dep ayttı Ruslan Balbek.
Matbuat hızmetiniñ malümatına köre, endi 10-dan ziyade leyha taqdim etildi. Konkurs neticesine binaen, moskvalı eykelci Salavat Şerbakovnıñ eykel kompozitsiyası ğalebe qazandı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
