İyün 15-te Rostov-na-Donu şeerinde mahkeme «Hizb ut-Tahrir» teşkilâtınen bağlı olğanında şeklenilgen Qırım musulmanları işini baqmağa devam ete.
Qırım.Aqiqat mühbiriniñ bildirgenine köre, çarşenbe künü Aleksandr taqma adlı «sırlı» şaat sorğuğa çekilmek kerek. O endi mahkemege keldi ve toplaşuv keçirilgen zalı yanındaki odada buluna.
Qabaatlayıcı aktqa binaen, Aleksandr yaqalanğanlarnıñ birinen camide tanış oldı, dostluq munasebetleri quruldı, bunıñ neticesinde «sırlı» şaatqa Aqyarda «Hizb ut-Tahrir» faaliyeti aqqında añlatıldı.
Mahkemede qabaatlanğanlarnıñ adliyecileri, toplaşuvda Rostov-na-Donudaki Ukraina konsulı Leonid Osavolük buluna, o yaqalanğanlarnen körüşmege tırışa.
Salı künü toplaşuvda üç şaat sorğuğa çekildi, olar, esasen, qabaatlayıcı delillerni bildirmekten vazgeçti. Kurbedinovnıñ sözlerine köre, toplaşuv «farsqa, taqiqatnıñ farsına oşamağa başlay».
Rostov-na-Donu şeerindeki Şimaliy Qavqaz okrug arbiy mahkemesi iyün 1-de dört Qırım musulmanı – Ferat Sayfullayev, Nuri (Yuriy) Primov, Rustem Vaitov, Ruslan Zeytullayevge qarşı cinaiy işni baqmağa başladı. Bu toplaşuvda prokuror olarğa qabaatlav neticesini oqudı. Qabaatlanğan Qırım sakinleri 2015 senesi Aqyar şeerinde yaqalandı. Taqiqatnıñ noqta-i nazarına binaen, olar «Hizb ut-Tahrir» teşkilâtınıñ iştirakçileri ola.
«Hizb ut-Tahrir» – halqara islâm siyasiy firqasıdır. Onıñ resmiy maqsadı islâm devletini ve musulman yaşayış tarzını qurmaqtır. Bu teşkilât Rusiye, Qazahistan ve Almaniyada yasaq etildi; Ukraina ve diger memleketlerde onıñ faaliyeti qanun boyunca keçirile bile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
